महिला नायब तहसीलदार आशा वाघ यांच्यावर जीवघेणा हल्ला

कौटुंबिक वादातून घडली घटना, हल्लेखोर सख्खा भाऊच

By MahaTimes ऑनलाइन | बीड

केज तहसील कार्यालयात घुसून महिला नायब तहसीलदार आशा वाघ यांच्यावर कौटुंबिक वादातून त्यांच्या सख्ख्या भावानेच कोयत्याने जीवघेणा हल्ला केल्याची धक्कादायक घटना सोमवारी सकाळी घडली. हल्ल्यात गंभीर जखमी आशा वाघ यांना अंबाजोगाईच्या स्वामी रामानंद तीर्थ रुग्णालयात दाखल करण्यात आले आहे असून त्यांची प्रकृती गंभीर असल्याचे समजते.

घटनेची अधिक माहिती अशी की, आशा वाघ या केज तहसील कार्यालयात नायब तहसीलदार पदावर कार्यरत आहेत. सोमवारी सकाळी 11.30 वाजेच्या सुमारास त्या आपले कार्यालयीन कामकाज करीत असतांना त्यांचा सख्खा भाऊ मधुकर दयाराम वाघ ( 45,दोनडिगर ता. चाळीसगाव जि. जळगाव) हा कार्यालयात आला. त्याने अचानक बहिण आशा यांच्यावर कोयत्याने मानेवर आणि डोक्यावर प्राणघातक हल्ला केला.

आशा वाघ या जीवाच्या आकांताने शेजारील संजय गांधी निराधार योजनेच्या कार्यालयात पळाल्या. यावेळी कार्यालयात उपस्थित कर्मचारी व नागरिकांनी हल्लेखोर मधुकर यास पकडून खोलीत बंद केले. सदर घटनेची माहिती समजताच अवघ्या काही वेळात प्रभारी सहाय्यक पोलीस निरीक्षक संतोष मिसळे, पोलीस उपनिरीक्षक वैभव सारंग पोलीस पथकासह घटनास्थळी दाखल झाले व हल्लेखोरास ताब्यात घेतले.

आशा वाघ यांची प्रकृती गंभीर असून त्यांना अधिक उपचारासाठी अंबाजोगाई येथील शासकीय रु ग्णालयात दाखल करण्यात आले आहे. हा हल्ला कौटुंबिक कारणातून झाल्याची प्राथमिक माहिती आहे. गेली काही दिवसांपासुन आरोपी मधुकर वाघ आणि आशा वाघ यांच्यात शेती व अन्य कारणावरून वाद सुरू आहे. यावरून हा हल्ला झाल्याचे समजते. आज मधुकर वाघ जळगाव येथून केज येथे आला व  कार्यालयात घुसून सख्या बहिणीवर जीवघेणा हल्ला केला. याप्रकरणी गुन्हा दाखल करण्याची प्रकिया सुरू आहे.