MahaTimes दीडशे कोटी रुपये खर्चून नवे मोबाइल खरेदी करणार
By MahaTimes ऑनलाइन |
मुंबई : अंगणवाडी सेविकांच्या मानधनात सुरुवातीला दहा टक्के वाढ करण्यात आली होती. मात्र, मुख्यमंत्री एकनाथ शिंदे आणि उपमुखमंत्री देवेंद्र फडणवीस यांनी बैठका घेतल्या. त्यानंतर अंगणवाडी सेविकांच्या मानधनात 20 टक्के वाढ करण्याचा निर्णय झाला, अशी माहिती शुक्रवारी पर्यटन आणि कौशल्य विकास मंत्री मंगलप्रभात लोढा यांनी विधानसभेत दिली. मात्र, ही मानधनवाढ कमी आहे, अंगणवाडी सेविकांचे प्रश्न सोडवण्यात सरकार कमी पडत आहे, असा आरोप करत विरोधकांनी सभात्याग केला.
अंगणवाडी सेविकांच्या मानधनात सध्या महाराष्ट्र देशात सात ते आठव्या स्थानी आहे. आता त्यात वाढ झाल्यानंतर आपण देशात चौथ्या स्थानी येऊ, अशी माहिती यावेळी लोढा यांनी दिली. सध्या अंगणवाडी सेविकांची 20 हजार 183 पदे रिक्त आहेत. या पदांची एक जानेवारीपासून भरती सुरू होणार असून, ते मे पू्र्वी भरणार असल्याचे आश्वासन त्यांनी दिले.
अंगणवाडी सेविकांना पूर्वी मोबाइलमध्ये माहिती भरताना ती इंग्रजीत भरावी लागायची. आता त्यात बदल करण्यात आला आहे. सेविकांना फक्त त्यांचे नाव इंग्रजीत टाकावे लागेल. त्यानंतर इतर माहिती मराठी भरता येईल, अशी माहिती मंत्री मंगलप्रभात लोढा यांनी दिली. राज्यात प्रायोगित तत्त्वावर कंटेनर अंगणवाडी सुरू करणार असून, पहिल्या अंगणवाडीचे मुंबईत मुख्यमंत्री एकनाथ शिंदे यांच्या हस्ते होणार आहे, अशी माहिती लोढा यांनी दिली.
